Сәуір айының алғашқы күні бесқарағайлықтар үшін жақсы жаңалықпен басталды. «Жайлы мектеп» ұлттық жобасы аясында облысымызда алғашқылардың бірі болып, берекесі мен бірлігі жарасқан Бесқарағай ауданында №1 жалпы білім беретін орта мектебі салтанатты түрде ашылып, лентасы қиылды. Іс-шараға облыс әкімі Берік Уәли арнайы қатысты.
Білім ордасының ашылу салтанатына сондай-ақ Бесқарағай ауданының әкімі Нұрбек Қошқарбаев, аудандық мәслихат төрайымы Мейрамгүл Абылғазинова, білім басқармасының өкілдері, ардагер ұстаздар, мектеп директорлары, ата-аналар мен ауыл тұрғындары және БАҚ өкілдері қатысты.
Аймақ басшысы Берік Уәли Бесқарағай халқын жаңа мектептің ашылуымен құттықтады.
— Сапалы білім мен тәрбие – мемлекетіміздің өркендеуінің басты негізі. Мемлекет басшысы Қасым-Жомарт Кемелұлы Тоқаевтың бастамасымен елімізде «Жайлы мектеп» ұлттық жобасы жүзеге асырылуда. Абай облысында аталмыш жоба аясында төрт бірдей жаңа мектеп бой көтерді. Семей қаласының Қарағайлы ықшам ауданында 1200 орындық, Водный кентінде 600 орындық, Аягөз қаласында 600 орындық және Бесқарағай ауданындағы 300 орындық мектептер салынды. Бүгін соның ішінде Семей қаласы мен Бесқарағай ауданында жаңа мектептер салтанатты түрде ашылып отыр. Бұл Абай, Мұхтар, Шәкәрім сынды алыптарды дүниеге әкеліп, бесігінде тербеген Абай еліндегі білім саласына деген үлкен құрметтің айқын көрінісі. Олай болса баршаларыңызды жаңа білім ордасының ашылуымен құттықтаймын. Жаңа білім ордасы оқушыларымыздың білім көкжиегін кеңейтіп, олардың жарқын болашағына жол ашады,- деді облыс әкімі Берік Уәли.
«Samruk — Kazyna Construction» акционерлік қоғамының басшысы Мәулен Айманбетов те бесқарағайлықтарға жүрекжарды лебізін білдіріп өтті. Бесқарағай ауданында талай білімді де дарынды шәкірттерді түлеткен ардагер ұстаз Нұрлан Құрғанбаевтың ақ батасынан соң лента қию рәсімі өтті. Лента қию құрметі облыс әкімі Берік Уәлиұлына, Бесқарағай ауданының қоғам белсендісі, ардагер ұстаз Зоя Ғазизқызына және ауданның озат оқушыларының бірі, республикалық, облыстық олимпиадалардың жеңімпазы, болашақ өзін-өзі басқару балалар ұйымының президенті Гүлім Шегебайға берілді.
Ақ жаулықты әжелердің шашуынан кейін облыс әкімі мен қонақтар білім ордасының ішіне кіріп, кабинеттерді аралап көрді.
— «Білекті бірді жығады, білімді мыңды жығады» деп халық даналығы айтып кеткендей, білімнің адам өміріндегі маңызы ерекше. Ұлағатты ұрпақ тәрбиелеу аса жауапты әрі күрделі міндет. Бұл орайда ауданымызда толық жабдықталған жаңа мектептің ашылуы – ұстаздар мен оқушылар үшін, ата-аналар үшін үлкен қуаныш. Осы мектептен ауданымыз бен облысымыздың, еліміздің абыройын асқақтататын шәкірттердің шығуына тілектеспіз,- деді аудандық Аналар кеңесінің төрайымы Руфия Кисамиева.
Мектептің бірінші қабатында ұлдар шеберханасы мен қыздар шеберханасы, математика, қазақ тілі, физика, химия кабинеттері мен бастауыш сыныптары кабинеттері, асхана мен спорт зал, ал екінші қабатта өзге оқу кабинеттері мен акт зал орналасқан. Білім ордасын аралап шыққан облыс әкімі оң бағасын беріп, аудан әкіміне бірқатар тапсырмалар жүктеді.
Жадыра ТӨЛЕГЕНҚЫЗЫ
