Облыс орталығынан Мемлекеттік сәулет-құрылыс бақылау басқармасының басшысы Сайлауғалы Байназаров Бесқарағай ауданының орталығы Бесқарағай ауылына жұмыс сапарымен келді. Сапар барысында ол аудан әкімі Нұрбек Қошқарбаевпен бірге ауданның бірқатар құрылыс нысандарын аралап, олардың қазіргі жай-күйімен танысты.
Атап айтқанда, Бесқарағай ауылында салынып жатқан жүзу бассейнінің құрылыс барысы тексерілді. Бұл нысан аудан тұрғындарының спорттық және демалыс қажеттіліктерін қанағаттандыруға бағытталған. Құрылыс алаңында жұмыс жүріп жатқанымен, кейбір кемшіліктер анықталды. Сайлауғалы Байназаров құрылыс барысында байқалған олқылықтарды мердігер мекемелерінің өкілдеріне көрсетті және оларды жою үшін нақты тапсырмалар берді.
Құрылыс сапасын арттыру мен белгіленген мерзімдерде аяқтау қажеттілігіне ерекше назар аударылды. Бұл маңызды нысанның уақытында және сапалы түрде аяқталуы ауданның инфрақұрылымдық дамуына маңызды үлес қосары сөзсіз.
Аудан әкімі Нұрбек Қошқарбаев құрылыс жұмыстарының барысын бақылауды жалғастырып, барлық нысандардың белгіленген мерзімде аяқталуын қамтамасыз ету және тұрғындардың қажеттіліктерін толық қанағаттандыру үшін қажетті шараларды қабылдайтындығын атап өтті.
Бұл жұмыс сапары Бесқарағай ауданында құрылыс жұмыстарын сапалы әрі тиімді жүргізу бағытындағы маңызды қадам болып табылады.
Е.РАХМЕТУЛИН,
«Біздің Бесқарағай»
